സ്പാർക്കിൽ ഈയിടെ ഉൾപ്പെടുത്തിയ മാറ്റങ്ങൾ കാരണം പല ഓഫീസുകൾക്കും ബില്ലെടുക്കാൻ കഴിഞ്ഞിട്ടില്ല. പ്രശ്നങ്ങളുടെ ആധിക്യം കാരണം, അവ കഴിവതും വേഗം പരീഹരിക്കുന്ന്തിനായി ജനുവരി 29 മുതൽ ഫെബ്രുവരി 10 വരെ ജില്ലാകേന്ദ്രങ്ങളിൽ പ്രശ്നപരിഹാര കാമ്പുകൾ തീരുമാനിച്ചിരീക്കയാ‍ണ്. ഈ കാമ്പിന്റെ ഉദ്ദേശ്യം ജിവനക്കാരിലെത്തിക്കാൻ, പക്ഷേ നിര്‍ഭാഗ്യവശാല്‍ കഴിഞ്ഞിട്ടില്ല.മുഹമ്മദ് സാറിന്റെ ഈ പോസ്റ്റിലൂടെ ആ ഉദ്ദ്യശ്യമാണ് പ്രധാനമായും ലക്ഷ്യമിടുന്നത്. കമന്റുകളായി സംശയങ്ങള്‍ ചോദിക്കൂ....ഉറപ്പായും മറുപടി പ്രതീക്ഷിക്കാം. സർക്കാർ/ എയിഡഡ് മേഖലയിലെ എല്ലാ ജീവനക്കാരുടെയും അദ്ധ്യാപകരുടെയും ശമ്പളം ഇപ്പോൾ സ്പാർക്ക് സോഫ്റ്റ്‌വേറിലൂടെയാണല്ലോ പ്രൊസസ് ചെയ്യുന്നത്. ശമ്പളബിൽ പ്രൊസസ് ചെയ്ത് ഒൺലൈൻ സബ്മിഷൻ നടത്തുന്നത് കൂടാതെ, ട്രാൻസ്ഫർ, പ്രമോഷൻ, ലീവ് മാനേജ്മെന്റ്, ശമ്പളം ബാങ്ക് അക്കൌണ്ടിൽ ക്രഡിറ്റ് ചെയ്യൽ തുടങ്ങി നിരവധി അനുബന്ധകാര്യങ്ങൾ സ്പാർക്കിൽ ഉൾക്കൊള്ളിച്ചുണ്ട്. സമയാസമയങ്ങളിൽ ഇത്തരം മൊഡ്യൂളുകളിലൊക്കെ അപ്ഡേഷനുകൾ വന്ന് കൊണ്ടിരിക്കുന്നു. 2016 ജനുവരി 1 മുതൽ സെൽഫ്ഡ്രോയിൺഗ് സംവിധാനം നിർത്തലാക്കിയതിനാൽ അതനുസരിച്ചുള്ള സൊഫ്റ്റ്‌വേർ അപ്ഡേഷൻ വന്നു. 2016 ഫെബ്രുവരി 1 മുതൽ ഓൺ‌ലൈൻ ലീവ് മാനേജ്മെന്റ് സിസ്റ്റം വരാൻ പോകുന്നു.
സോഫ്റ്റ്‌വേർ അപ്ഡേഷനുകൾ വരുമ്പോൾ അത് സംബന്ധിച്ച് താൽകാലിക പ്രശ്നങ്ങളും സ്വാഭാവികമാണു. തിരുവനന്തപുരത്തുള്ള സ്പാർക്ക് ഓഫീസുമായി ഫോൺ, ഇ-മെയിൽ, ചാറ്റിങ്ങ് വഴി ബന്ധപ്പെട്ട് മാത്രമെ നിലവിൽ ഇത്തരം പ്രശ്നങ്ങൾ പരിഹരിച്ച് കിട്ടാൻ മാർഗ്ഗമുള്ളൂ. (കണ്ണൂരിൽ അടുത്ത കാലത്തായി ഒരു റീജ്യണൽ ഹെല്പ് സെന്റർ പ്രവർത്തനമാരംഭിച്ചിട്ടുണ്ട്. വൈകാതെ, ഓരോ ജില്ലയിലും ഇത്തരം ഹെല്പ് സെന്ററുകൾ തുടങ്ങാൻ പദ്ധതിയുണ്ടെന്ന് കേൾക്കുന്നു). സ്പാർക്കിൽ പുതിയ മാറ്റങ്ങൾ ഉൾപ്പെടുത്തുമ്പോൾ ഓഫീസ് തലത്തിൽ ഈ സോഫ്റ്റ്‌വേർ കൈകാര്യം ചെയ്യുന്നവർക്ക് അവ പരിചയപ്പെട്ട് വരാനുള്ള കാലതാമസവും, സോഫ്റ്റ്‌വേറിലെ തകരാറുകളും സർവറുകളുടെ ശേഷിക്കുറവുമൊക്കെ ശമ്പളബിൽ വൈകാൻ കാരണമാകുന്നുണ്ട്. സ്പാർക്ക് ഓഫീസിലെ ജീവനക്കാർ കഠിനാദ്ധ്വാനം ചെയ്താലും ചിലപ്പോൾ ഈ പ്രതിസന്ധി തരണം ചെയ്യാൻ ദിവസങ്ങളെടുക്കാറുണ്ട്.
സോഫ്റ്റ്‌വേർ അപാകതയോ, സർവർ പ്രശ്നങ്ങളൊ കാരണം ശമ്പളബിൽ വൈകുമ്പോൾ വിവിധ ഓഫീസുകളിൽ സ്പാർക്ക് കൈകാര്യം ചെയ്യുന്നവർ സ്പാർക്ക് ഓഫിസിനെ പഴിക്കുക സർവ്വസാധാരണമാണ്. എന്നാൽ, ഇത്ര ബൃഹത്തായ ഒരു സോഫ്റ്റ്‌വേർ എങ്ങിനെ നടപ്പാക്കിക്കൊണ്ടിരിക്കുന്നുവെന്നതിനെ കുറിച്ചോ, അതിന്റെ പിന്നിൽ പ്രവർത്തിക്കുന്നവരെ കുറിച്ചോ വളരെ കുറച്ച് പേർക്ക് മാത്രമെ അറിവുള്ളൂ. മേൽ‌പറഞ്ഞ പ്രസ്നങ്ങളൊക്കെ താമസം കൂടാതെ പരിഹരിച്ച് മറുപടി നൽകുന്നതിനു സ്പാർക്ക് ഓഫീസിൽ ഇരുപതിൽ താഴെ ജീവനക്കാരാണുള്ളത്. കാലോചിതമായി പരിഷ്കരിച്ച വേതനം പോലും ലഭിക്കാതെ ഇവർ കഠിനാദ്ധ്വാനം ചെയ്യുന്നുണ്ട്. ഇപ്പോൾ ജോലിസമയം രാവിലെ 9 മുതൽ വൈകീട്ട് 6 മണി വരെയാക്കി. അവധി ദിവസങ്ങളിലും ചിലർ ജോലി ചെയ്യുന്നുണ്ട്. ഏതാണ്ട് തുമ്പിയെ കൊണ്ട് കല്ലെടുപ്പിക്കുന്ന അവസ്ഥയെന്ന് പറഞ്ഞാൽ തെറ്റില്ല. ഇവരെ കൂടാതെ, വിവിധ ഡിപ്പാർട്മെന്റുകളിലെ ഡി.എം.യു മാർ ഉൾപ്പെടെയുള്ള പ്രതിഫലേഛയില്ലാതെ രാപകൽ ഭേദമന്യെ ഫോൺ, ഇ-മെയിൽ, മറ്റ് സോഷ്യൽ മീഡിയകൾ വഴി പ്രവർത്തനനിരതരായ നിരവധി ജീവനക്കാർ കൈമാറുന്ന സഹായങ്ങൾ കൂടിയാണു സ്പാർക്ക് സോഫ്റ്റ്‌വേർ യാഥാർത്ഥ്യമാക്കുന്നത്. തുടക്കം മുതൽ കേരളത്തിലെ അദ്ധ്യാപക-അനദ്ധ്യാപക ജീവനക്കാർക്ക് സ്പാർക്ക് സംബന്ധിച്ച അവബോധം നൽകുന്നതിൽ മാത്സ്‌ബ്ലോഗ് വഹിച്ച പങ്ക് നിസ്തുലമാണെന്ന് പറയേണ്ടതില്ലല്ലോ. ഇപ്പോൾ വാട്സപ്പ് ഗ്രൂപ്പുകളും ഇക്കാര്യത്തിൽ വഹിക്കുന്ന പങ്ക് വലുതാണ്. വിവിധ ഡിപ്പാർട്മെന്റുകളിലെ മേൽ‌പറഞ്ഞ തരത്തിലുള്ള ജീവനക്കാരും സ്പാർക്ക് മാസ്റ്റർ ട്രെയിനർമാരും അടങ്ങിയ 24x7 Spark Helps എന്ന വാട്സപ് ഗ്രൂപ്പ്, സ്പാർക്ക് ഹെല്പ് എന്ന ലക്ഷ്യവും കടന്ന് മറ്റ് മേഖലകളിലും ഇടപെടുന്ന ഒരു കൂട്ടായ്മയായി വളർന്നത് ഈയിടെ ശ്രദ്ധ നേടിയതാണ്.
അടുത്തിടെ ഉൾപ്പെടുത്തിയ മാറ്റങ്ങൾ കാരണം ഉണ്ടായ പ്രശ്നങ്ങൾ പരിഹരിക്കപ്പെടുന്നതിലുള്ള കാലതാമസം കാരണം പല ഓഫീസുകളിലും ശമ്പളബിൽ പ്രൊസസ് ചെയ്യാൻ കഴിയാത്ത അവസ്ഥ നിലവിലുണ്ട്. നിലവിലുള്ള പ്രശ്നങ്ങൾ എത്രയും വേഗം പരിഹരിക്കുക എന്ന ലക്ഷ്യത്തോടെ 2016 ജനുവരി 29 മുതൽ ഫെബ്രുവരി 10 വരെ ജില്ലാ കേന്ദ്രങ്ങളിൽ രണ്ട് ദിവസം വീതമുള്ള ഒരു പ്രശ്നപരിഹാര കാമ്പ് നടത്താൻ സ്പാർക്ക് ഓഫീസ് തീരുമാനിച്ചിരിക്കുകയാണ്. സ്പാർക്ക് ഓഫീസിൽ നിന്നുള്ള രണ്ട് മാസ്റ്റർ ട്രെയിനർമാർ വീതം ഓരോ കാമ്പിലും പ്രശ്നങ്ങൾ പരിഹരിച്ച് കൊടുക്കും. സ്പാർക്ക് സഹായങ്ങൾ ചെയ്തു കൊടുക്കുന്ന, ജില്ലയിലെ മറ്റു ഏതാനും ജീവനക്കാർ കാമ്പ് അറേഞ്ച് ചെയ്യുന്നതിനും നടത്തിപ്പിനും അവരെ സഹായിക്കാനുണ്ടാകും. ഈ കാമ്പ് സ്പാർക്ക് പരിശീലനം നൽകുകയോ, അവബോധന ക്ലാസ് നടത്തുകയോ ചെയ്യുന്നില്ല. (29, 30 തിയ്യതികളിൽ എർണാകുളത്ത് നടന്ന കാമ്പിൽ, കാമ്പിന്റെ ഉദ്ദേശ്യം ശരിയാം വണ്ണം പ്രസിദ്ധപ്പെടുത്താൻ കഴിയാതിരുന്നതിനാൽ, ആദ്യ ദിവസം അറുനൂറോളം പേർ പരിശീലനത്തിന് എത്തിയെന്നാണ് കേൾക്കുന്നത്. അതിനാൽ ആദ്യ ദിവസം പ്രശ്നപരിഹാരം നടന്നില്ല. രണ്ടാം ദിവസം ഏറെ കുറെ പ്രശ്നങ്ങൾ പരിഹരിച്ച് കൊടുക്കാൻ കഴിഞ്ഞു.). കാമ്പിന്റെ സ്ഥലം, തിയ്യതി, പങ്കെടുക്കേണ്ട ഓഫീസുകൾ (ജില്ല അടിസ്ഥാനത്തിൽ) താഴെ കൊടുക്കുന്നു.
1) എർണാകുളം കളക്ടറേറ്റ് – 29/01/2016 & 30/01/2016 – എർണാകുളം, തൃശൂർ
2) കോട്ടയം കളക്ടറേറ്റ് – 01/02/2016 & 02/02/2016 – കോട്ടയം, ഇടുക്കി
3) ഐ.ടി @ സ്കൂൾ, പാലക്കാട് – 03/02/2016 & 04/02/2016 – പാലക്കാട്, മലപ്പുറം
4) ഐ.ടി @ സ്കൂൾ കൊല്ലം – 05/02/2016 & 06/02/2016 – കൊല്ലം, പത്തനംതിട്ട
5) ഗവ. കോളെജ് ഓഫ് ടീച്ചർ എഡുക്കേഷൻ കോഴിക്കോട് – 08/02/2016 & 09/02/2016 – കോഴിക്കോട്, വയനാട്
6) ആലപ്പുഴ കളക്ടറേറ്റ് – 09/02/2016 – ആലപ്പുഴ
7) സ്പാർക്ക് ഹെല്പ്ഡസ്ക്, കണ്ണൂർ - 09/02/2016 & 10/02/2016 – കണ്ണൂർ, കാസർഗോഡ്.
ബിൽ, എസ്റ്റാബ്ലിഷ്മെന്റ് എന്നിവ സ്പാർക്കിൽ കൈകാര്യം ചെയ്യുന്നതിൽ പരിചയമുള്ള ജീവനക്കാർക്ക് സാധാരണഗതിയിൽ കൈകാര്യം ചെയ്യാൻ കഴിയാത്ത പ്രശ്നങ്ങൾ പരിഹരിച്ച് കിട്ടാനുണ്ടെങ്കിൽ, അവ പരിഹരിച്ച് കിട്ടുന്നതിനു വേണ്ടി ഈ കാമ്പുകളെ സമീപിക്കാവുന്നതാണു. സമയലഭ്യതയനുസരിച്ച് കഴിയുന്നതും കാമ്പിൽ വെച്ച് തന്നെ പരിഹരിച്ച് കൊടുക്കും. ബാക്കിയുള്ളവ എഴുതിയെടുത്ത് പിന്നീട് സ്പാർക്ക് ഓഫീസിൽ നിന്നും പരിഹാരം കാണും. നിലവിൽ പ്രശ്നങ്ങളൊന്നുമില്ലാത്തവർ കാമ്പിൽ എത്തേണ്ടതില്ല. മാത്രമല്ല, മറ്റുള്ളവരെ പ്രവേശിപ്പിക്കുന്നത് കാമ്പിന്റെ പ്രവർത്തനത്തെ ബാധിക്കുമെന്നതിനാൽ പ്രവേശനത്തിന് നിയന്ത്രണമുണ്ടായേക്കാവുന്നതുമാണ്.
RSS Feed
